يا سندريلا...
يابنت حسب الوصف
آية من الجمال..
يا سندريلا...
يا حكاية لسّة معششة
ف بال العيال
يا وصف قهر..
وذل فقر..
فايق الاحتمال..
و ف كل ده ..
كل المسائل ماشية عال
من بعدها يجي السؤال
طب افرضي
ان العجوزة أم العصايا
ما جاتلكيش؟؟؟
أو افرضي
نظر الأمير كان انضرب
بقى شيش ف بيش؟؟
بالتالي يعني ما حبكيش
أو ان حتى الجزمة
- حلّ الأزمة-
مسكت ف رجلك
وانتي ماشية
ما جريتيش؟؟
حتى ان جريتي ونسيتيها
ف حفرة ضلمة
مش كانت القصة
تصبح مفيش؟؟؟
وترجعى عل بيت ابوكي
ومرات ابوكي وبنتها
يبهدلوكي
ويطلعّوا عيون أبوكي
وهو واقف حضرته
وكأنه طبعا مش أبوكي!!
يا سندريلا..
يكفى انتظار الساحرة
والأمنيات المستحيلة المبهرة
يا سندريلا البايتة ف الحلم الحرير
انسي بقى وهم الأمير
نسيانه ممكن يمنحك
بدل الأمير
خمسين أمير
سبعين مليون أمير
نسيانه ممكن يمنحك
معنى الحياة المستقلة
فاهمة قصدى يا سندريلا؟؟
ولحد قومك م الخيال
ولحد ماتجاوبي السؤال
مش هاحكي عنك للعيال
ولا هابيّت حد منهم
و هو حالم.... بالمُحال
ولا الأماني...ال مستغلة
فاهمة كلامى يا سندريلا
